ქუვეითის სასოფლო სამეურნეო საქმეთა და თევზის რესურსების უწყების მიერ გავრცელებული განცხადების თანახმად, ქუვეითმა საქართველოდან პირუტყვის იმპორტი აკრძალა.

განცხადების ავტორები აღნიშნავენ, რომ გადაწყვეტილება ეფუძნება ცხოველთა ჯანმრთელობის დაცვის მსოფლიო ორგანიზაციის მიერ გამოქვეყნებულ წლიურ ანგარიშს, სადაც მითითებულია, რომ საქართველოში აღინიშნება კატარული ცხელების (Bluetongue disease) ეპიდემია.

"დაავადების გამოვლენის შემთხვევაში პირუტყვი დაბრუნდება უკან საქართველოში"- წერს ქუეითის სასოფლო სამეურნეო საქმეთა და თევზის რესურსების უწყება.

აღნიშნულ განცხადებას სურსათის ეროვნული სააგენტო გამოეხმაურა. მათი თქმით, საქართველოში ცხვრის კატარალური ცხელების (Bluetongue) არსებობა არ დადასტურდა.

როგორც სურსათის სააგენტოს განცხადებაშია აღნიშნული, ამის შესახებ დაუყოვნებლივ ეცნობა ცხოველთა ჯანმრთელობის მსოფლიო ორგანიზაციას, რომელიც თავის მხრივ ვალდებულია, მიაწოდოს ინფორმაცია ყველა წევრ ქვეყანას.

„ამის მიუხედავად, საინფორმაციო საშუალებებში გავრცელდა ინფორმაცია, რომ ცხვრის კატარალური ცხელების გამო ქუვეითის სასოფლო-სამეურნეო საქმეთა და თევზის რესურსების უწყებამ საქართველოდან ცოცხალი ცხოველების იმპორტი აკრძალა. უნდა აღინიშნოს, რომ საქართველოდან ქუვეითში ცოცხალი ცხოველების ექსპორტი ბოლო ოთხი წელია, არ განხორციელებულა. ქართული მხარე კიდევ ერთხელ განმარტავს, რომ ცხოველთა ჯანდაცვის მსოფლიო ორგანიზაციის ბოლო ანგარიშში აღნიშნულია, რომ ეჭვი საქართველოში დაავადება ცხვრის კატარალური ცხელების (Bluetongue) შესახებ არ დადასტურდა.

(იხილეთ ბმული http://www.oie.int/wahis_2/public/wahid.php/Reviewreport/Review?reportid=19690) საქართველოში აღებული ნიმუშები გადაიგზავნა ცხოველთა ჯანდაცვის მსოფლიო ორგანიზაციის პირბრაიდის (დიდი ბრიტანეთი) რეფერალურ ლაბორატორიაში - გაგზავნილი 11 ნიმუშიდან ცხვრის კატარალური ცხელება არცერთში არ აღმოჩნდა. საქართველოს სსიპ სურსათის ეროვნული სააგენტო ამის შესახებ ექსპორტიორ ქვეყანებს და ცხოველთა მსოფლიო ჯანდაცვის ორგანიზაციის წევრებს დამატებით აცნობებს“,-ნათქვამია სააგენტოს განცხადებაში.