მკვლელობის მოტივი – “შავი კარტი” - "პროკურორის მკვლელობის მოტივი დადგენილია"

კრიმინალი - 12:56, 22 Feb, 2016

17607

პროკურორის მკვლელობის მოტივი დადგენილია - ამ სათაურით აქვეყნებს გაზეთი "პრაიმტაიმი" მასალას, სადაც სამეგრელო ზემო სვანეთის საოლქო პროკურორის ვახტანგ ქირიას მკვლელობის სავარაუდო მოტივზეა საუბარი.

გამოცემა წერს, რომ მკვლელობის მოტივი “შავი კარტი” შეიძლება იყო. ჟურნალისტის ინფორმაციით, სწორედ ამ ვერსიაზე მუშაობს შოთაძის უწყება.

პრაიმტაიმი ბიძინა კუჭავას აზარტული მოთამაშედ განიხილავს და წერს, რომ ეს უკანასკნელი ე.წ. ხელზე „გამაზვასაც“ მიმართავდა.

ერთ-ერთი ვერსიით, მკვლელობამდე რამდენიმე თვით ადრე მან პროკურორ ქირიას კარტი, სავარაუდოდ, „სეკა“ ეთამაშა და საკმაოდ სოლიდური თანხა წააგო. ქირია კუჭავას სწორედ ე.წ. „თავანის“ ჩაბარებას სთხოვდა და ამ მიზნით სადარბაზოსთან არაერთხელ იყო მისული.

მათივე ინფორმაციით, უკვე დაკითხულია რამდენიმე მოწმე, რომელსაც შესაძლოა, ჰქონდეთ ინფორმაცია კუჭავას მიერ ქირიასთან წაგებული თანხის შესახებ.

იმას რომ საგამოძიებო ორგანო ამ მიმართულებით მუშაობს, კუჭავებისა და ქირიების ოჯახში არ უარყოფენ” –

„გამომძიებელმა გვითხრა, შესაძლოა, „შავ კარტს“ თამაშობდნენ და მაგის გამო მოხდა მკვლელობაო. ვერ წარმომიდგენია, პროკურორს „შავი კარტის“ თამაშის დრო ჰქონდეს. ანუ, მათი ვერსიით, მოქმედი პროკურორი ზუგდიდიდან დადიოდა იმისთვის, რომ მთელი ღამე კარტი ეთამაშა ბიძინა კუჭავასთან და მერე უკან წასულიყო. გვითხრეს, ვითომ ღამე თამაშობდნენ ჩუმად „შავ კარტს“. ჯერ ერთი, ბიძინა ყოველ ღამე სახლში იყო და მეორეც, ვალის გამო დღეს ვინ კლავს ადამიანს. კარტი რომ ითამაშო, მინიმუმ, 5 საათი მაინც უნდა იჯდე. ასეთი დროით ბიძინა ღამე სახლიდან არასოდეს გასულა. ბიძინა თავის დროზე რულეტკას თამაშობდა, კარგად ესმოდა. კარტი არასდროს უყვარდა და არც თამაშობდა. კი ბატონო, აზარტული იყო, აგებდა და იგებდა კიდეც, მაგრამ ეს იყო მისი ბიზნესიდან გამომდინარე“, – ამბობს “პრაიმტაიმთან” საუბრისას ბიძინა კუჭავას ქვრივი.

მარი ნიკოლოზაშვილს თქმით, მკვლელობამდე რამდენიმე დღით ადრე ვახტანგ ქირია ბიძინა კუჭავას შეხვდა და მათ ავტომობილში საუბრობდნენ.

„ქირია ახალ წლამდე იყო მოსული, კორპუსთან მანქანაში ისხდნენ და საუბრობდნენ. ეს იყო დეკემბერში. მაშინ სახლში არ ამოსულა. შემდეგ, საახალწლოდ იყო მოსული, ხილი მოგვიტანა – ჩემი ეზოს ხილიაო. ზოგადად, თბილისში რამდენჯერაც ჩამოვიდოდა, ბიძინას დაურეკავდა და ხვდებოდნენ ხოლმე ერთმანეთს. ალბათ, საქმეზე ლაპარაკობდნენ. ეს ყველაფერი ძალიან ჰგავს ბინძურ შურისძიებას. ეჭვი გამიჩნდა, რომ ვიღაცას ბიძინა კუჭავას ჯინი ჰქონდა და ასეთი სიბინძურეები აუგორეს"- აცხადებს ბრალდებულის მეუღლე.

ნიკოლოზაშვილი დარწმუნებულია, რომ ბიძინა კუჭავა და ვახტანგ ქირია ორივე მოკლულია.

"აშკარაა, რომ პროკურორი რაღაც ინტერესებს შეეწირა. ძველ, ბურუსით მოცულ საქმეებს ჰგავს მისი მკვლელობა, ჩემი ქმარი კი ნაჩქარევად მიაკლეს ზედ“, – აცხადებს მარი ნიკოლოზაშვილი.